Amgueddfa Cymru yn caffael paentiad gan feistr bywyd llonydd

Mae bywyd llonydd gan yr artist Eidalaidd dylanwadol o'r 20fed ganrif, Giorgio Morandi, i'w weld yn Amgueddfa Genedlaethol Caerdydd. Llwyddodd Amgueddfa Cymru i gaffael y paentiad drwy'r cynllun Derbyn Eitemau yn Lle Treth (a weinyddir gan Gyngor Celfyddydau Lloegr) dan gytundeb hybrid gyda nawdd ychwanegol gan Ymddiriedolaeth Derek Williams a'r Gronfa Gelf.

Bywyd Llonydd gyda Photeli (1942) yw un o naw paentiad gan Morandi mewn casgliadau cyhoeddus yn y DU, a'r bywyd llonydd cynharaf. ⁠Mae ar fenthyg i Amgueddfa Cymru ers 1971 o gasgliad preifat. Erbyn hyn, diolch i gynllun Derbyn Eitemau yn Lle Treth Etifeddiant Llywodraeth EF yn ogystal â grantiau mawr gan Ymddiriedolaeth Derek Williams a'r Gronfa Gelf, mae'r Amgueddfa wedi caffael y gwaith pwysig hwn ar gyfer y casgliad cenedlaethol.

⁠Ganwyd Giorgio Morandi yn Bologna yn 1890 ac mae llawer yn ei ystyried yn feistr ar fywyd llonydd. Datblygodd arddull nodedig iawn lle byddai gwrthrychau bob dydd fel poteli, tuniau a jygiau yn cael eu grwpio gyda'i gilydd cyn eu lleihau i'w ffurf hanfodol. Gan ddefnyddio paled cynnil, roedd Morandi yn trawsnewid y gwrthrychau yn rhywbeth myfyriol a barddonol, gan bontio'r naturiol a'r haniaethol.

Gall ymwelwyr ag Amgueddfa Genedlaethol Caerdydd nawr weld y gwaith ochr yn ochr ag ysgythriad gan Morandi, Bywyd Llonydd gyda Lliain ar y Chwith, a brynwyd gan Ymddiriedolaeth Derek Williams yn 2017 ac sydd ar fenthyciad hirdymor i Amgueddfa Cymru. ⁠⁠Cafodd yr artist Ffrengig Paul Cézanne ddylanwad mawr ar Morandi. Mae’n briodol felly bod ei waith yn cael ei ddangos ochr yn ochr â dau o brif ddarluniau bywyd llonydd eraill yr Amgueddfa – Bywyd Llonydd gyda Thebot Cézanne (1906), a Bywyd Llonydd gyda Poron gan Picasso (1948), gafodd ei gaffael diolch i grant hael gan y Gronfa Gelf yn 2009.

Dywedodd Pennaeth Celf Amgueddfa Cymru, Ceri Jones:

‘Mae Morandi yn cael ei ystyried yn un o artistiaid modern mwyaf dylanwadol yr 20fed ganrif. Mae gallu gweld un o’r llond llaw o’i baentiadau olew yn y DU yn yr Amgueddfa yn gyfle euraidd.

‘Hoffwn ddiolch o galon i’r cynllun Derbyn Eitemau yn Lle Treth, Ymddiriedolaeth Derek Williams a’r Gronfa Gelf am eu cefnogaeth wrth ein helpu i gaffael gwaith celf  sy’n destun cryn edmygedd ar gyfer y Casgliad Cenedlaethol. Mae’n golygu y bydd y paentiad ar gael i genedlaethau’r dyfodol ei weld, ei ymchwilio a’i fwynhau.’

Dywedodd Michael Clarke CBE, Cadeirydd Panel y Cynllun Derbyn Eitemau yn Lle Treth:

“Yn y bôn, mae’r Cynllun yn dod â diwylliant llawn ysbrydoliaeth o bedwar ban at gymunedau ledled y DU. Mae Bywyd Llonydd gyda Photeli Giorgio Morandi (1890-1964) – y bywyd llonydd cynharaf ganddo mewn casgliad cyhoeddus yn y DU bellach – yn enghraifft berffaith o’r effaith hon. Diolch i’r Cynllun a chefnogwyr hael a ddarparodd nawdd ychwanegol, gall ymwelwyr ag Amgueddfa Cymru fwynhau a chymharu’r gwaith arloesol a nodweddiadol hwn gan Morandi â’r gwaith bywyd llonydd arall gan Cézanne a Picasso sydd hefyd yn y Casgliad Cenedlaethol.”

Dywedodd Emmie Kell, Cyfarwyddwr Amgueddfeydd ac Eiddo Diwylliannol, Cyngor Celfyddydau Lloegr:

“Mae dangos y bywyd llonydd gan Giorgio Morandi yn Amgueddfa Cymru yn newyddion gwych, sy’n golygu y gall mwy o bobl fwynhau gwaith gan un o artistiaid pwysicaf yr 20fed ganrif. Hwyluswyd hyn gan y Cynllun, sy'n chwarae rhan enfawr yn ein nod, fel yr asiantaeth ddatblygu genedlaethol ar gyfer amgueddfeydd, wrth gefnogi cyfleoedd diwylliannol anhygoel i bawb.”

Dywedodd y Gweinidog Diwylliant, y Farwnes Twycross:

"Rwyf wrth fy modd bod y gwaith hwn gan artist Eidalaidd mor ddylanwadol bellach yn gallu cael ei fwynhau gan filoedd o ymwelwyr bob blwyddyn, diolch i'r Cynllun.

"Bydd y caffaeliad hwn yn caniatáu i’r Amgueddfa arddangos un o baentiadau prin Morandi mewn casgliadau cyhoeddus yn y DU, gan ganiatáu i fwy o bobl weld ei arddull unigryw a'i feistrolaeth ar baentio bywyd llonydd.

Dywedodd William Wilkins CBE, Ymddiriedolwr a Chynghorydd Artistig Ymddiriedolaeth Derek Williams:

‘Mae’n bleser gan Ymddiriedolaeth Derek Williams helpu Amgueddfa Cymru i gaffael y bywyd llonydd hardd a phwysig hwn gan Giorgio Morandi. Mae Morandi yn un o artistiaid Eidalaidd pwysicaf yr 20fed ganrif, gyda gweledigaeth unigryw, bron yn drosgynnol, o wrthrychau bob dydd sy’n ei osod ar wahân i bob artist arall. Yn ei dôn arallfydol mae ei waith yn perthyn i waith Gwen John ac mae ganddo enw da yn rhyngwladol.

‘Roedd Morandi hefyd yn feistr ar ysgythru a bydd y paentiad yn cael ei ddangos gydag enghraifft wych o’r dechneg hon sy’n eiddo i Ymddiriedolaeth Derek Williams ac sydd hefyd yn Amgueddfa Genedlaethol Caerdydd.’

Dywedodd Jenny Waldman, Cyfarwyddwr y Gronfa Gelf:

"Mae bywyd llonydd gan Giorgio Morandi yn ein hannog i edrych unwaith eto ar wrthrychau bob dydd mae’n ei baentio gyda dwysedd mud. Rydw I’n hynod o falch bod y Gronfa Gelf wedi medru helpu Amgueddfa Cymru i gael y llun y prin yma gan Morandi i ychwanegu at ei chasgliad – un o naw yn unig ym Mhrydain sydd mewn casgliad cyhoeddus – ac yn bosib oherwydd aelodau'r Tocyn Celf Genedlaethol. Mae’n hyfryd meddwl y bydd ymwelwyr ac Amgueddfa Genedlaethol Caerdydd yn medru mwynhau'r darn anhygoel yma am flynyddoedd i ddod."

Mae Bywyd Llonydd gyda Photeli  bellach i'w weld yn Oriel 13, Amgueddfa Genedlaethol Caerdydd. Am ragor o wybodaeth, ewch i www.amgueddfa.cymru.